Býlið

Stórhóll er staðsettur í Skagafirði í Lýtingsstaðahreppi hinum forna, um 18 km í suður frá  Varmahlíð við veg 752 Skagafjarðarveg.   

Stórhóll er lítil jörð,  50 ha og hefur verið í okkar eigu frá 2008, en við fluttum á Stórhól 1999.  Við búum með geitur, hross, endur, hunda og ketti.  Árið 2011 festum við kaup á 3 gámum sem byggðir voru saman  og er þar í dag Rúnalist Gallerí og vinnustofa.

Rúnalist Gallerí er lítil sveitabúð á býlinu, með fjölbreyttar matvörur beint frá býli, bæði frá okkur og öðrum smáframleiðendum. Vörur úr geita- og ærkjöti, andaregg, sultur, hlaup, sölt, chutney, osta, krydd, og fleira. Við bjóðum einnig upp á fjölbreytt, einstakt listhandverk og nytjavörur sem að mestum hluta er unnið heima á býlinu, eða af öðrum fjölskyldumeðlimum.  Geitaband, Sauðaband, uppskriftir, prjónapakka, húfur, vettlinga, púða, myndverk, kort, könnur með dýramyndum, bækur, mynjagripi og fleira.

Hlaðan  var notuð sem fjárhús áður en við sameinuðum sauðahjarðir okkar, við og elsti sonurinn, haustið 2022.  Kindurnar eru á hans býli og við hjálpum til eftir þörfum.  Sumarið 2023  var okkur í tilefni 15 ára Afmælis Beint frá Býli, boðið að halda Bændamarkað fyrir Beint frá Býli aðila á Norurlandi vestra.  Þá var Hlaðan tekin, innréttingum skutlað út á tún, og hlaðan skrúbbuð hátt og lágt, gólfið teppalagt.  Beint frá Býli dagurinn tókst með því líkum ágætum að hann hefur fest í sessi á landsvísu.  Og í Hlöðunni  höldum við bændamarkað, nokkrum sinnum á ári, ásamt fleiri viðburðum s.s. Diskósúpu. Í Hlöðunni tökum við einnig á móti gestum og segjum okkar sögur, sýnum gamla muni, hráefni og afurðir frá býlinu.  Hlaðan og notkunarmöguleikar hennar eru enn í þróun.